Anësori i Barcelonës dhe kampioni i EURO 2024, Lamine Yamal, është shpallur zyrtarisht fitues i çmimit prestigjioz “Golden Boy” për vitin 2024.

Ky çmim, i cili nderon lojtarët më të mirë në Evropë nën moshën 21 vjeç, jepet çdo vit nga gazeta italiane Tuttosport.

Yamal, i cili ishte favorit i padiskutueshëm për ta fituar këtë çmim, u konfirmua si fitues i çmimit kryesor pas një viti të jashtëzakonshëm si me klubin ashtu edhe me kombëtaren. 

Kulmi i suksesit të tij erdhi me fitoren e EURO 2024 me Spanjën gjatë verës, ndërsa festoi ditëlindjen e tij të 17-të gjatë turneut.

Yamal kryesoi listën e ngushtë me 25 lojtarë, ku përfshiheshin gjithashtu Kobbie Mainoo dhe Alejandro Garnacho të Manchester United, Kenan Yildiz dhe Samuel Mbangula të Juventusit, si dhe Endrick dhe Arda Güler të Real Madridit.

Ai bëhet lojtari i tretë i Barcelonës që fiton këtë çmim në katër vitet e fundit, pas suksesit të Pedri-t në 2021 dhe Gavi-t në 2022. Fituesi i mëparshëm ishte Jude Bellingham i Real Madridit.