Një epokë e re e eksplorimit kulturor ka filluar për kryeqytetin e Kosovës. Projekti i shumëpritur “Harta Kulturore e Prishtinës” tani është i disponueshëm për publikun, duke ofruar një platformë digjitale që lejon qytetarët dhe vizitorët të zbulojnë dhe të përjetojnë pasuritë kulturore të Prishtinës në një mënyrë të re dhe të qasshme. Kjo iniciativë e re synon të bëjë kulturën dhe trashëgiminë e qytetit më të afërt për të gjithë.

“Me kënaqësi njoftojmë përfundimin e projektit “Harta Kulturore e Prishtinës”, një platformë digjitale që do të shërbejë si një udhërrëfyes kulturor për qytetarët e Prishtinës dhe vizitorët e saj. Kjo platformë inovative, e cila është e qasshme nëpërmjet https://culture01.net/ , ofron mundësinë për të eksploruar monumentet historike më të rëndësishme, për të marrë informacione mbi ngjarjet kulturore si koncerte, festivale, ekspozita dhe performanca teatrale, si dhe për të shfletuar një kalendar të detajuar të aktiviteteve kulturore”.

Ky projekt ka për qëllim të lehtësojë lokalizimin e ngjarjeve dhe objekteve kulturore në kryeqytet, të rrisë pjesëmarrjen në aktivitetet artistike dhe kulturore, të promovojë trashëgiminë kulturore dhe turizmin e qytetit dhe të ofrojë një përvojë unike dhe të qasshme për të gjithë.

Platforma do të zgjerohet dhe do të punohet më tej për përkthimin e materialit në disa gjuhë të tjera, me qëllim që të bëhet më e qasshme për komunitetet e ndryshme që jetojnë në Kosovë dhe për turistët e huaj. Ky projekt është mbështetur nga Komuna e Prishtinës.