Ndërsa Kosova i afrohet zgjedhjeve të 9 shkurtit, zëdhënësi i LDK-së, Besian Mustafa tha se qytetarët janë para dy zgjidhjeve: një Kosove të izoluar dhe të fundit në Evropë apo një Kosove të zhvilluar dhe me perspektivë për të gjithë qytetarët e saj.

“Mendoni se si dëshironi të duket Kosova pas katër vitesh. E izoluar, e fundit në Evropë në ekonomi, arsim e shëndetësi, e varfër, me fëmijët tuaj që largohen nga për të kërkuar shpresë në shtete të largëta? Apo dëshironi të ardhmen që po ofron LDK në krye me Lumirin?” – deklaroi Mustafa.

Sipas tij, alternativa që ofron LDK-ja, në krye me Lumir Abdixhikun, garanton një të ardhme me ndryshime të prekshme për Kosovën.

“Një e ardhme ku kosovarët mund të lulëzojnë, me investime të larta të huaja, me 1,5 miliardë euro të investuara vetëm në Prishtinë, me mësim tërëditor nëshkolla anembanë Kosovës, me projekte kapitale që zgjidhin sfidat tuaja, dhe më e rëndësishmja, me udhëheqës që me të vërtetë kujdesen për ju, qytetarët tanë, popullin tonë. LDK ka programin e duhur dhe ka aftësinë për të ofruar ndryshime të prekshme.” – tha ai.