Shefi i grupit parlamentar të Aleancës për Ardhmërinë e Kosovës, Pal Lekaj, thotë se partia e tij është e gatshme dhe përkrah protestat për të kundërshtuar demarkacionin.

Por sipas tij, këto protesta nuk duhet që të thirren pa koordinimin e të gjitha partive opozitare.

Lëvizja Vetëvendosje ftoi qytetarët që të mblidhen para Kuvendit të Kosovës të enjten për të kundërshtuar votimin e demarkacionit, cështje që fillimisht është ngritur nga AAK.  Para disa muajsh, AAK, Vetëvendosje e NISMA, kanë organizuar një numër protestash të përbashkëta për të kundërshtuar demarkacionin dhe asociacionin, por për shkak të mospajtimeve, opozita tashmë ka ndarë rrugët. Deir më tani, AAK ka organizuar e vetme një protestë.

Në këtë kontekst, Lekaj thotë se nuk e ka përkrahur protestën e Vetëvendosjes.

Konsiderojmë se tani për tani nuk është momenti të organizohen protesta, sidomos jo pa u koordinuar nga të gjitha partitë e opozitës, njerëzve të shoqërisë civile dhe intelektualë të tjerë”, theksoi Lekaj për të përditshmen Zëri.

Më 3 gusht, përfaqësues opozitarë u ulën në një tryezë me komisionin shtetëror për procesin e demarkacionit, por palët kanë mbajtur qëndrimet e njëjta të shprehura deri më tani.  Por, përkundër kësaj, qeveria do të procedojë në kuvend miratimin e marrëveshjes me Malin e Zi për demarkacionin./Insajderi.com