Kryetari i Nismës për Kosovën, Fatmir Limaj, ka thënë se partia e tij është e përgatitur që të mbrojë votën në zgjedhjet e parakohshme në Drenas që do të mbahen këtë të diele.

“Jemi tërësisht të mobilizuar për të mbrojtur votën”, ka thënë ai, duke shtuar se në të gjitha takimet që kanë pasur me përkrahësit e tyre, kanë bërë apel që të “mos preken votat.”

Ai në një intervistë për emisionin Info Box të RTV Dukagjinit, ka thënë se pret edhe nga mediat dhe organizatat jo-qeveritare që të angazhohen të dielën.  Sipas tij, kjo është më e lehtë të bëhet meqë zgjedhja do të ndodhe në vetëm një komunë.

Ne e kemi obligim që Drenasi të ketë një proces të drejtë, ka thënë Limaj.

Ai ka thënë se edhe gjatë kohës sa ai dhe Jakup Krasniqi kanë qenë në PDK, e kanë ngritur çështjen e manipulimit të votave.

“Qysh në 2010 kemi reaguar për këtë”, ka thënë Limaj, duke thënë se Jakup Krasniqi kërkesën për të mos vjedhur vota e kishte bërë ndaj anëtarësisë së PDK-së sa ka qenë sekretar i kësaj partie, por edhe kërkesa e tij i është drejtuar edhe të gjitha parive, sepse ai këtë kërkese e ka bërë nga posti i Kryetarit të Kuvendit të Kosovës.

Zgjedhjet në Drenas do të mbahen këtë të dielë.  Ish-kryetari i kësaj komune, Nexhat Demaku, është dënuar me burgim, andaj sipas ligjeve në fuqi, kjo komunë është dashur të shkojë në zgjedhje./Insajderi.com