Lideri i Nismës për Kosovën, Fatmir Limaj, ka shprehur mirënjohje dhe respekt për procesin e rregullt dhe demokratik në Drenas duke shtuar se merita kryesore për mbarëvajtjen e atij procesi i takon qytetarëve të Drenasit.

Ish-anëtari i PDK-së, tanimë kryetar i NISMA-s, ka thënë se zgjedhjet lokale të jashtëzakonshme të mbajtura dje në Drenas kanë treguar se në Kosovë nuk trafikohet më vota.

“Në zgjedhjet e Drenasit është dëshmuar se nuk bëhet më trafikim vote në Kosovë, dhe se Drenasi është shembull se demokracia është duke u zhvilluar në Kosovë”, ka thënë Limaj, njofton Insajderi.

Limaj është shprehur i bindur se kandidati i NISMA-s, Isa Xhemajlaj i cili doli i dyti në zgjedhjet lokale të mbajtura të dielën në Drenas, do të fitojë në balotazh ndaj kandidatit të PDK-së, Ramiz Lladrovci.

“Në krye me kandidatin tonë i kanë dhënë Drenasit një mundësi për ndryshim dhe jam i bindur se do të vazhdojnë të angazhuar për të punuar së bashku në frymën e ndryshimit me 55 % të votimeve dhe përfundimisht Drenasi do të ketë kryetar të ardhshëm të saj, kryetarin Isa Xhemajlaj”, është shprehur Limaj.

Isa Xhemajlaj mori 26.32 për qind të votave në raundin e parë të zgjedhjeve në Drenas, ndërsa Ramiz Lladrovci i PDK arriti të fitoi 45.63 për qind. /Insajderi.com