Dragan Stojanoviq nga Panqeva e komunës së Ranillugut, dje ishte arrestuar nën akuzën për kryerjen e krimeve të luftës, ndërsa sot pasdite është liruar nga mbajtja në stacionin policor të Mitrovicës së Jugut, raporton B92.

Stojanoviq tha se ishte arrestuar gabimisht, sepse pas shqyrtimit ka kuptuar që urdhër arresti ishte për një person tjetër me emrin e njëjtë.

“Policia më ka arrestuar mua në bazë të misionit të EULEX-it për krime lufte. Në bazë të deklaratës që kam dhënë në gjykatë në Mitrovicën Jugore, në prezencë të avokatit Zivojun Jokanoviq, shumë shpejt doli që urdhër arresti nuk ishte për mua, por për ndonjë tjetër me emrin Dragana Stojanoviq i cili jeton në veri të Kosovës, ish punëtor i ‘Trepçës’, i cili kishte punuar më parë në polici,” tha Stojanoviq për RTV Puls.

Stojanoviq punon në gjykatën e komunës së Ranillugut.

I kontaktuar nga Insajderi, zëdhënësi i Policisë së Kosovës, Baki Kelani ka deklaruar se vendimin për lirimin e tij e ka dhënë gjykata dhe se policia nuk komenton deklaratat e Stojanoviq. /Insajderi.com