Një kërkesë e kryeministrit Isa Mustafa që të gjendet një “zgjidhje kreative” për liberalizmin e vizave për Kosovën deri sa të bëhet ratifikimi i marrëveshjes së demarkacionit, është kundërshtuar nga nënkryetarja e Parlamentit Evropian, Ulrike Lunacek.

Sipas Lunacek, kushti i BE-së për demarkacionin mbetet i pandryshueshëm.

“Bashkimi Evropian nuk do të pranojë ndryshimin e kritereve, përfshirë edhe marrëveshjen e demarkacionit me Malin e Zi”, ka thënë ajo.

“Për BE-në, demarkacioni me Malin e Zi dhe lufta efikase kundër krimit të organizuar dhe korrupsionit janë kushte të pandashme dhe pa realizimin e tyre Kosova nuk mund të bëhet pjesë e regjimit të vizave Shengen të BE-së”, ka thënë ajo për Tribuna Channel.

Javën e kaluar, kryeministri Mustafa kishte bërë këtë kërkesë në punimet e Kongresit të Partive Popullore Evropiane.

“Kërkova një zgjidhje kreative, ndonjë formë të modalitetit ku qytetarët do të gëzonin lëvizjen e lirë, derisa ne do të punonim në ratifikimin e shënjimit të kufirit me Malin e Zi”, ka shkruar Mustafa në llogarinë e tij në Facebook.

“Në veçanti, theksova se Kosova ka mbetur vendi i vetëm i izoluar në Evropë me regjim të vizave, se kemi përmbushur kriteret për liberalizim dhe mbetjen e kriterit të demarkacionit me Malin e Zi”, ka thënë ai./Insajderi.com