Ministria e Administrimit të Pushtetit Lokal, ka konfirmuar se në mesin e përfituesve të projektit për ndërtim të shtëpive në veri janë daja i Faton Pecit, dhe vëllai i kryetarit të Leposaviçit, Lulzim Hetemi. Ata kanë përfituar 46 mijë euro për ndërtimin e shtëpive të tyre. MAPL nuk kishte publikuar listën e përfituesve të këtij subvencioni. Kjo ministri madje fillimisht nuk ka ofruar qasje për të parë listën e përfituesve, por që pas dy muajve ka vendosur që t’i përgjigjet pozitivisht kërkesës së Gazetës Insajderi për qasje në dokumente publike.

Gazeta Insajderi

Me 26 qershor Gazeta Insajderi ka raportuar se nga thirrja e MAPL-së për ndërtimin e shtëpive, kanë përfituar persona të afërt me pushtetin.

Besim Asllani, i cili ka lidhje familjare, me ministrin Faton Peci, dhe Bashkim Hetemi, vëlla i kryetarit, Lulzim Hetemi kanë marrë fonde nga MAPL.

Ky raportim i Gazetës Insajderi është konfirmuar pas gati dy muajve nga kjo ministri.

Ata kanë dërguar listën me emrat e personave që përfituan e që janë edhe daja i ministrit Peci dhe vëllai i Hetemit.

Nga kjo thirrje përfituan edhe 19 persona të tjerë.

MAPL tregon përfituesit dy muaj pas raportimit të Insajderit

Gazeta Insajderi me 18 qershor ka kërkuar nga Ministria e Administrimit të Pushtetit Lokal, që të ofroj qasje në emrat që kanë përfituar nga thirrja për ndërtim të shtëpive.

Të njëjtit nuk kishin ofruar qasje nën arsyetimin e ruajtjes së privatësisë, ndonëse listat e përfituesve të mëhershëm ishin publikuar në web-faqen e ministrisë. 

Por, pasi Gazeta Insajderi është ankuar në Agjencinë për Informim dhe Privatësi, kjo ministri ka dërguar listën e përfituesve.

I afërmi i Faton Pecit, Besim Asllani dhe Bashkim Hetemi, vëlla i kryetarit, Lulzim Hetemi, kanë përfituar 46 mijë euro nga ministria.

Ministri Peci, personin që ka përfituar nga thirrja e MAPL-së, e ka daj.

Afërsia e tyre mund të kuptohet edhe në fotot e mëposhtme:

Peci në vitin 2023, kishte paralajmëruar se shtëpia, pranë truallit të gjyshit të tij, sërish do të ndërtohet.

Ky postim është shpërndarë edhe nga daja i tij.

Ndërsa në një postim tjetër, ministri dhe Asllani shihen se kanë dal për kafe së bashku.

“Ju tek ministrit me dal me mu“, ishte mbishkrimi i vendosur në fotografinë e tyre nga Besim Asllani.

Përveç tij, 46 mijë euro për ndërtim të shtëpisë ka marrë edhe Bashkim Hetemi, që është vëlla i kryetarit të Leposaviçit, Lulzim Hetemi.

Madje nga postimet në profilin e tij në “Facebook”, kuptohet se shtëpisë ia ka bërë “përhajrin”.

Ndërsa ka edhe foto familjare me kryetarin Hetemi.

Çka thanë dy përfituesit e fondeve pasi dolën përfitues?

Gazeta Insajderi kishte kontaktuar me dajën e Faton Pecit, ai kishte konfirmuar se ka përfituar subvencionim.

Besim Asllani kishte thënë se nuk ka ndikuar afërsia që të dal përfitues, pasi sipas tij në luftë i janë djegur dy shtëpi.

“Jo nuk qëndron fakti qe jam përfitues me që jam daja i ministrit Peci ,por që me të drejte jam përfitues sepse mu dhe familjes time me janë djegur dy shtëpi gjatë luftës 1999. Njëra me është djegur Mitrovicën e Veriut, ndërsa sa tjetra në komunën e Leposavicit. 15 vite kam jetuar me qera mbas 1999. Kurrë asnjëherë s’kam përfituar asgjë nga komuna e as Qeveria. Unë me të drejtë kam aplikuar për rindërtim edhe në Mitrovicën e Veriut edhe në komunën e Leposaviçit, sepse me janë djegur pronat në të dy lokacionet. Andaj pse pasna qëlluar daja i ministrit aktual nuk do të thot që më cenohet e drejta për rindërtim“, deklaroi Asllani për Gazetën Insajderi.

Ndërsa Bashkim Hetemi, vëllai i Lulzim Hetemit nuk kishte pranuar të deklarohet për rasti, ndonëse ka pranuar se ka përfituar 46 mijë euro.

Hulumtimi i Insajderit për milionat e shpërndara nëpër shtëpi nga Ministria e Elbert Krasniqit- Specialja konfirmon hetimet

Gazeta Insajderi në dhjetor të 2023-tës përmes një hulumtim disa mujor kishte zbuluar se si Ministria e Administrimit të Pushtetit Lokal e drejtuar nga Elbert Krasniqi e kishte shpenzuar fondin 3 milionësh për ndërtim e renovim shtëpish. Kompanitë që kryejnë këto punë u zgjodhën pa tender, diçka që në projektet e më hareshme të gjasshme qeveritare u bë ndryshe.

Gazeta Insajderi ka raportuar se Prokuroria Speciale ka nisur hetimet lidhur me këtë tender.

“Kane kërkuar të gjitha dokumentet me të dhëna nga MAPL”, tha burimi i Insajderit.

Gazeta Insajderi poashtu ka kërkuar përgjigje edhe nga Prokuroria por të njëjtit, nuk kanë dhënë ndonjë detaj.

“Lidhur me rastin për të cilin keni pyetur Ju informoj se Prokuroria Speciale në këtë fazë nuk mund të iu ofroj asnjë informacion”, tha zëdhënësja për media e Prokurorisë Speciale, Liridona Kozmaqi.