Njerëzit e zhvendosur nga Libani jugor po kthehen në shtëpi pas një marrëveshjeje armëpushimi midis Izraelit dhe Hezbollahut.

IDF ka paralajmëruar banorët që të shmangin lëvizjen në jug ende – por shumë libanezë janë drejtuar për në shtëpitë e tyre.

Ka bllokime trafiku në autostradën kryesore midis Bejrutit dhe jugut, dhe makinat janë të mbushura me familje, çanta, valixhe dhe dyshekë, raporton BBC.

Forcat izraelite janë ende në pjesë të jugut, pasi tërheqja e tyre pritet të jetë graduale gjatë armëpushimit 60-ditor, transmeton gazeta online Reporteri.net.

Ushtria libaneze, që pritet të rrisë praninë e saj në jug me 5,000 ushtarë shtesë, tha se po merrte “masat e nevojshme” për të përfunduar vendosjen e saj.

Në Liban, më shumë se 3,500 njerëz janë vrarë, një milion janë zhvendosur dhe pjesë të mëdha të vendit tani janë në gërmadha.

Jashtë bazës mbështetëse të Hezbollahut, shumë e kritikojnë grupin për tërheqjen e Libanit në një konflikt që nuk ishte në interesat e tij.

Megjithatë, kundërshtarët e Hezbollahut mund ta shohin këtë si një mundësi për të kufizuar ndikimin e një grupi që shpesh përshkruhet si një shtet brenda një shteti. Marrëveshja mund t’i japë fund këtij konflikti.

Armëpushimi i shpallur nga SHBA dhe Franca të martën në mbrëmje hyri në fuqi në orët e mëngjesit.Tupat izraelite do të tërhiqen nga Libani dhe Hezbollahu do të lëvizë në veri të lumit Litani, rreth 30 km në veri të kufirit me Izraelin.

Presidenti i SHBA-së, Joe Biden thotë se armëpushimi është krijuar për të qenë i përhershëm, por Izraeli thotë se rezervon të drejtën të godasë Hezbollahun nëse shkel marrëveshjen.

Të dyja palët shkëmbyen zjarr deri pak para afatit, me Hezbollahun që tha se lëshoi ​​drone drejt Izraelit të martën mbrëma, ndërsa Izraeli nisi sulmet ajrore në Bejrut pasi ushtria e tij lëshoi ​​urdhra evakuimi në zonë.