Punëtorët teknik po bënin përgatitjet e fundit për të vendosur banerin “se unë të dua sa Kosovën” para ekranit gjigant në sheshin “Skënderbeu”, kur dhjetëra qytetarë u mblodhën me flamuj në dorë.

Por ata nuk ishin fansa të kombëtares së futbollit, por protestues të cilët për të 11-n herë kanë marshuar nga sheshi “Zahir Pajaziti” deri tek objekti i Qeverisë për të protestuar kundër korrupsionit.

Duke brohoritur “me hajna nuk ka shtet” dhjetëra qytetarë marshuan nëpër sheshin kryesor të kryeqytetit teksa kur u afruan tek Qeveria njoftuan qytetarët “që të kenë kujdes për xhepat e tyre pasi kanë hyrë në Zonën Pronto”.

Protestuesit brohoritën edhe “me kafe nuk shtet” duke iu referuar qytetarëve të cilët po pinin kafe në ndërkohë që po protestohej.

Por protestuesit nuk u morën me organizatorët e shfaqjes së lojës së futbollit mes Kroacisë dhe Kosovës që do të zhvillohet sonte në Shkodër.

#Protestoj ka nisur si reagim ndaj përgjimeve të publikuara në Dosjen e Shefave, në gazetën Insjaderi.