Ministria e Arsimit, përmes një njoftimi, ka sqaruar opinionin se qarkullimi i djeshëm i një lajmi se një zyrtar i Ministrisë së Arsimit, Shkencës dhe Teknologjisë është arrestuar në Qendrën Korrektuese në Dubravë, duke tentuar të fusë lëndë narkotike brenda hapësirës së këtij burgu, thotë se kjo nuk është e vërtetë.

Sipas kësaj informate, zyrtari i arrestuar është i punësuar në shkollën e kësaj Qendre në Dubravë.

“Menjëherë pas publikimit të këtij lajmi, MAShT ka kërkuar nga Sektori i Inspektimit në Pejë që të marrë informata të detajuara rreth rastit. Sipas raportit të Inspektoratit rajonal, personi i arrestuar nuk është zyrtar i MAShT. Ky person është mësimdhënës i gjuhës angleze në Shkollën e Mesme Teknike “Mithat Frashëri” në Gurrakoc të Istogut, paralelja e ndarë në Qendrën Korrektuese në Dubravë”, thuhet në njoftimin e MAShT-it.

“Pra, MAShT sqaron opinionin e gjerë se, personi i arrestuar nuk është zyrtar i Ministrisë (siç është raportuar), por është mësimdhënës i punësuar nga Drejtoria Komunale e Arsimit në Istog”, përfundon sqarimi./Insajderi.com