Marigona Geci, vajza e ish-deputetit Gani Geci, synon përsëri një vend në Kuvendin e Kosovës nga radhët e Lidhjes Demokratike të Kosovës (LDK). Ajo ka lindur më 9 shkurt 1992 në Skenderaj dhe pikërisht në ditën e zgjedhjeve me 9 shkurt 2025 do të festojë 33-vjetorin e lindjes.

Në zgjedhjet e vitit 2019, ajo arriti të sigurojë mbi 17 mijë vota, duke u renditur ndër shtatë deputetët më të votuar të LDK-së.

Marigona është fëmija i parë i Gani Gecit dhe ka lindur vetëm pesë muaj para aksionit të parë të babait të saj kundër forcave serbe. Ajo është e martuar me Milot Lalën nga komuna e Vitisë dhe është nënë e dy fëmijëve, një vajze dhe një djali.

Shkollimin fillor e ka përfunduar në fshatin Llaushë, ndërsa shkollën e mesme në Skënderaj.

Marigona është e diplomuar në Fakultetin Ekonomik të Universitetit të Prishtinës në degën Banka, Financa dhe Kontabilitet, duke përfunduar studimet bachelor me notë mesatare 9.77. Gjithashtu, ajo ka përfunduar studimet master në të njëjtin departament me notë mesatare 9.50.

Përveç kësaj, Marigona ka përfunduar edhe Gjuhën dhe Letërsinë Angleze në fakultetin Filologjik të Universitetit të Prishtinës.

Aktualisht, ajo është në përfundim të studimeve të doktoratës në drejtimin Ekonomiks, në kuadër të programit “Tempus,” që realizohet në bashkëpunim me tri universitete Evropiane.

Në aspektin profesional, Marigona punon si ligjëruese e rregullt për lëndët ekonomike në Fakultetin Ekonomik të Universitetit të Prizrenit.

Ajo flet rrjedhshëm gjuhën gjermane dhe angleze.

Në vendin e saj të punës në Universitetin e Prizrenit, ajo njihet si “Zonja e Hekurt” ose “Margaret Thatcher e Kosovës.”

Këtë vit pritet të mbrojë temën e doktoratës, një hap i rëndësishëm në karrierën e saj akademike dhe profesionale.