Një Ministri e Shëndetësisë pa ministër, një klinikë e ‘larë’ me gjakun e pafajshëm të një shtatzëne, tre krisma plumbash, një nënë që nuk arriti të ia ndjente aromën të birit dhe një sistem që nuk po jep përgjegjësi.
Gazeta Insajderi
Kosova është me ushtrues detyre të ministres së Shëndetësisë që nga muaji tetor, kur ministri Rifat Latifi dha dorëheqje. Dafina Gexha-Bunjaku, këtë pozitë po e mbanë për të dytën herë që nga koha kur vendi po qeveriset nga kryeministri Albin Kurti. Deri tani u ndërruar dy ministra në këtë dikaster.
Tashmë janë bërë 100 ditë pa ministër të këtij dikasteri dhe nga qeveria ende nuk kanë asnjë emër të propozuar si kandidate potencial për të udhëhequr Ministrinë e Shëndetësisë.
Nga opozita i thanë Gazetës Insajderi se peng i mos emërimit të një personi në karrigen e të parit të Shëndetësisë është vet partia në pushtet.
Një mosmarrëveshje në mes të partisë së Vetëvendosjes dhe partisë Guxo, posti i ministrit të Shëndetësisë ka mbetur ende me ushtrues detyre.
Deputeti i PDK-së, Bekim Haxhiu njëherit edhe anëtar i Komisionit për Shëndetësi, në një prononcim për Gazeten Insajderi ka thënë se pozita e ministrit të Shëndetësisë ka mbet peng i grupeve të interesit brenda partive qeverisëse.
“Po shihet që pozita e ministrit të Shëndetësisë ka mbetur peng e grupeve të interesit brenda LVV dhe GUXO”, tha Haxhiu për Insajderin.
Ndërsa, deputeti i AAK-së, Shemsedin Dreshaj, po ashtu anëtari i Komisionit për Shëndetësi i tha Gazetës se një marrëveshje politik në mes koalicioni qeverisës ka bërë që të mbetemi pa ministër.
Dreshaj mendon se ministri në ardhje do të jetë nga Vetëvendosja.
“Deri tani nuk ka ndonjë emër të propozuar për ministër të MSH. Mosemërimi i ministrit të Shëndetësisë është peng i marrëveshjes politike të koalicionit qeverisës. Unë mendoj qe nuk propozohet prej partisë guxo askush, do të jetë i VV-së”, tha Dreshaj për Insajderin.
‘Sistemi shëndetësorë është prioriteti yt’, ishin fjalët e qeveritarëve gjithnjë por realiteti përkon ndryshe.
Ministria e Shëndetësisë është pa ‘zot shtëpie’ dhe askush nuk jep ndonjë sqarim për këtë.
Rasti i fundit makabër që ndodhi ka bërë që ky dikaster të kryqëzohet edhe më shumë për jotransparencë dhe papërgjegjësi. Hamide Magashi, një 35 vjeçare shtatzëne në muajin e nëntë u vra mizorisht nga ish-burri i saj para dyerve të Klinikes së Gjinekologjisë, në QKUK.
Një ‘urdhër’ i prerë ndërpriti çdo formë komunikimi apo transparence me udhëheqësit e këtij dikasteri, e që kishte të bënte me tragjedinë që ndodhi brenda institucioni publik.
Që nga drejtori i kësaj klinike, Zef Ndrejaj i cili tash e më shumë se 30 ora nga ngjarja nuk ka nxjerr asnjë reagim lidhur me vrasjen që ndodhi para klinikes që ai udhëheq.
Kurse, ud drejtoresha e ShSKUK-së, Pranvera Zejnullahu-Raci dhe ud ministrja e Shëndetësisë, Dafina Gexha-Bunjaku dje në mbledhjen e komisionit parlamentar të Shëndetësisë zgjodhën heshtjen kur u pyetën për dorëheqjen morale dhe përgjegjësi.
Gazeta Insajderi ka kontaktuar drejtori e Gjinekologjisë që nga dita kur ndodhi rasti tragjik por i njëjtit nuk nuk u përgjigj asnjëherë deri më tani.
Po ashtu, Gazeta ka pyetur ShSKUK-së lidhur me intervenimin e mjekëve për shpëtimin e foshnjës nga nëna e vrarë, por të njëjtit që nga dje nuk ka kthyer përgjigje.
Përveç kësaj as mjekë dhe infermierë në Klinikën e Gjinekologjisë nuk kanë pranuar të flasin për Insajderi, pavarësisht insistimit gjatë këtyre dy ditësh.
Kronologjia e vrasjes mizore të Hamide Magashi
Një grua e re 35 vjeçare me foshnjën e saj që pritej ta sillte në jetë brenda këtyre dy ditësh, u vra nga ish-burri i saj, para Gjinekologjisë.
E ndjera e kishte denoncuar për dhunë ish-burrin dhe ishte në proces divorci derisa ndaj vrasësit të saj ishte ngritur aktakuzë për “Kanosje”, kishte edhe një urdhër gjykate të mos i afrohej asaj.
Ishte kapur edhe me armë zjarri, por Gjykata Themelore e Ferizajt e dënoi vetëm me gjobë. Por, përkundë të gjitha këtyre, Sokol Halili ishte lënë i lirë nga organet e drejtësisë, aq sa të thyente urdhrin e gjykatës e me armë zjarri, brenda hapësirës së një institucioni tjetër shtetëror – QKUK – të merrte dy jetë lehtësisht
Vrasjet më të rënda të grave në Kosovë nga bashkëshortët e tyre, e kanë një të përbashkët të hidhur. Për kërcënimet, dhunën psikike e fizike, është i njoftuar zyrtarisht edhe shteti. Respektivisht policia, prokuroria e gjykata.
Edhe në rastin e mbrëmshëm vrasësi Sokol Halili, ishte person i njohur për këto tri hallka të drejtësisë.
Ish-bashkëshortja e tij, tani e ndjera Hamide Magashi e kishte denoncuar Halilin në polici për dhunën që e ushtronte ai. Këtë e ka bërë para disa muajsh, shkruan Gazeta Insajderi.
Dhunën ndaj tashmë të ndjerës e kanë konfirmuar edhe familjarë të saj. Motra dhe dhëndri i saj, nga QKUK-ja aty ku edhe ndodhi krimi makabër deklaruan se e ndjera ka katër muaj që është ndarë nga vrasësi pasi ai ushtronte dhunë ndaj 35 vjeçares. Ajo ishte në muajin e fundit të shtatzënisë dhe brenda dy ditësh pritej ta kryente lindjen.
Lidhur me denoncimin e saj në polici, prokuroria Themelore e Ferizajt, kishte nisur hetimet. Me 10 gusht ajo e ngriti aktakuzën.
Ky institucion e ngarkonte Halilin me veprën penale “Kanosje”, shkruan Gazeta Insajderi.
“Me datë 10.08.2022, Prokuroria Themelore në Ferizaj – Departamenti i Përgjithshëm, ka ngritur aktakuzën e evidentuar si: PP.II.nr,1066/2022, me të cilin ka akuzuar të pandehurin S.H. për veprën penale kanosja nga neni 181 paragrafi 4 lidhur me paragrafin 2 të KPRK-së, ndaj të dëmtuarës H.M”, thuhet në konfirmimin e Gjykatës së Ferizajt.
Halili, në seancën e parë që është mbajtur për këtë rast me kishte kundërshtuar aktakuzën, me arsyetimin se nuk e pranon fajësinë për veprën penale.
“Me datë 07.09.2022 lidhur me këtë aktakuzë është caktuar dhe mbajtur shqyrtimi fillestar, me ç ‘rast i pandehuri S.H. ka deklaruar se nuk e pranon fajësinë për veprën penale për të cilën akuzohet”
Gjykata me datë 18 nëntor ka marr aktvendim dhe ka refuzuar kërkesën e mbrojtësi të pandehurit për hudhje të aktakuzës dhe kundërshtimit të provave.
Pas një muaji, nga ngritja e aktakuzës, zyrtarisht u kërkuar edhe urdhër mbrojtje ndaj 35 vjeçares Hamide Magashi. Këtë e bëri Zyra për Mbrojtjen e Viktimave në Ferizaj.
“Me datë 08.09.2022, nga Zyra për Mbrojtje dhe Ndihmë e Viktimave në Ferizaj, është paraqitur kërkesë për lëshimin e urdhrit mbrojtës ndaj palës përgjegjëse S.H. sipas nenit 13 dhe 14 të Ligjit për Mbrojtje nga dhuna në familje”, thuhet në konfirmimin e gjykatës.
Me 13 shtator, gjykata lëshoi vendimin për udhërmbrojtje. Rrjedhimisht ish-bashkëshorti Sokol Halili, nuk do të guxonte t`i afrohej ish-bashkëshortes me të cilën sipas familjarëve ishte në proces divorci.
Sipas këtij vendimi, Hamide Magashi ishte në mbrojtje të shtetit për gjashtë muaj. Urdhëri i gjykatës do të duhej të zbatohej nga policia e Kosovës.
“Gjykata pas mbajtjes së seancës së shqyrtimit të kërkesës së urdhrit mbrojtës, me datë 13.09.2022 ka lëshuar aktvendimin për urdhër mbrojtje me të cilën ka aprovuar kërkesën për urdhër mbrojtje të palës së mbrojtur dhe palës përgjegjëse i ka shqiptuar masat mbrojtëse, në kohëzgjatje prej gjashtë muajve duke filluar nga data 13.09.2022 deri më datë 13.03.2022”.
“Ky aktvendim i është dorëzuar palëve dhe atë palës përgjegjëse, mbrojtësit të tij, palës së mbrojtur, mbrojtësit të viktimave, QPS –Lipjan si dhe Stacioni Policor në Lipjan i cili është urdhëruar që ta bëjë zbatimin e vendimit të urdhrit mbrojtës”, thuhet më tej në konfirmimin e Gjykatës së Ferizajt.
Brenda periudhës gjashtë mujore sa ishte në fuqi urdhëri për mbrojtjen e Hamide Magashit, edhe një zhvillim tjetër kishte ndodhur në organet e drejtësisë.
Sokol Haliti, që ishte kapur nga Policia e Kosovës me armë të zjarrit, shpëtoi lehtësisht edhe përkundër që kishte aktakuzë për kanosjen e bashkëshortes dhe urdhër të prerë që të mos i afrohej.
Gjykata i dha vetëm dënim me gjobë, shkruan Gazeta Insajderi.
“Me datë 23.09.2022, me aktgjykimin e evidentuar si: 2022:174052, i pandehuri S.H. është shpallur fajtor për veprën penale mbajtja në pronësi, kontroll ose posedim të paautorizuar të armëve nga neni 366 paragrafi 1 të KPRK-së dhe i është shqiptuar dënim me gjobë”, thuhet në konfirmimin nga gjykata.
Gjatë krejt kësaj periudhe prej muajit gusht e deri natën kritike, Sokol Halili ishte lënë i lirë nga paraburgimi.
Halili e vrau ish-gruan dhe foshnje që pritej ta sillte në jetë brenda këtyre ditësh, por u largua pa arritur të kapej nga Policia. Ndodhet në arrati edhe pas gati 20 orësh prej kur kreu vrasjet. Derisa trupi i Hamide Megashit ndodhet në Institutit të Mjekësisë Ligjore për Obduksion. /Gazeta Insajderi
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2024 Gazeta Online Insajderi - Të gjitha të drejtat e rezervuara.
