Si rrjedhojë e operacioneve të kërkim shpëtimit në detin Mesdhe, roja bregdetare italiane ka mundur të shpëtojë mbi 6 mijë emigrantë vetëm në 3 ditët e fundit.

Njoftimi është bërë publik përmes një deklarate me shkrim nga autoritetet e rojës bregdetare.

Autoritetet kanë thënë se si rrjedhojë e operacioneve humanitare në Mesdhe, mbi 6 mijë emigrantë janë shpëtuar në tri ditët e fundit. Ata kanë vënë në dukje se në këto operacione kanë marrë pjesë edhe disa organizata joqeveritare.

Stacioni për Ndihmë ndaj Emigrantëve në Det të Hapur (MOAS) ditën e diel, përmes një deklarate në Twitter, ka thënë se në 24 orët e fundit ata kanë asistuar në shpëtimin e qindra emigrantëve në 11 gomone të ndryshme.

MOAS ka thënë se të paktën 7 emigrantë janë mbytur, ndërsa ka theksuar se në mesin e tyre ishte dhe një fëmijë 8-vjeçar. MOAS ka thënë gjithashtu se ka shpërndarë 1 mijë jelekë shpëtimi për emigrantët të cilët ndodhen në gomonet e trafikantëve të qenieve njerëzore, në pritje për të kaluar në ato të rojës bregdetare, , raporton Anadolu Agency.

Mediet vendase thonë se emigrantët vijnë kryesisht nga vende të ndryshme të Afrikës, Siria, Pakistani, Bangladeshi dhe vende të tjera.