Ceremonia e inaugurimit të Presidentit Thaçi, në të cilën morën pjesë qindra persona nga vende të ndryshme të botës, i ka kushtuar buxhetit të shtetit rreth 82 mijë euro.

Thaçi kishte vendosur që ceremonia të mbahej në sheshin Skënderbeu në Prishtinë, ndërsa një gjë e tillë ka ndodhur për herë të parë në Kosovë.

Shpenzimet e bëra për organizimin e ceremonisë do të paguhen nga tri institucione: presidenca, Zyra e Kryeministrit dhe Ministria e Punëve të Jashtme.

Të dhënat janë siguruar nga kërkesa për qasje në dokumente publike të cilën e ka bërë portali Telegrafi.  Këto shpenzime që ende nuk janë paguar tërësisht, u bënë kryesisht për shërbime hoteliere, akomodim të mysafirëve, dreka zyrtare dhe pije, shpenzime për filharmoninë, shpenzime për logjistikën, për skenën dhe dekorimin e saj, pastaj për zërimin dhe shërbimet e tjera rreth manifestimit, si dhe për dekorimin e qytetit me flamuj dhe billboarde.

Këshilltarët e presidentit patën njoftuar se për cermoninë e inaugurimit kanë qenë të ftuar rreth 1200 persona.

Në ceremoni ka parakaluar edhe Garda e Nderit e Forcave të Sigurisë së Kosovës./Insajderi.com