Fraza e kryeministrit shqiptar Edi Rama, në mbledhjen e përbashkët në mes të qeverisë së Shqipërisë dhe asaj të Kosovës, “një komb, një ëndërr”, ka tërhequr vëmendjen e medieve serbe të cilat kanë shkruar menjëherë pas përfundimit të takimit në Prishtinë.

Mediumi serb “B92” thekson frazën e Ramës në titull të artikullit të saj për këtë mbledhje: “Rama shkon për ‘një komb, një ëndërr’, përpara takimit të përbashkët”. Në artikullin e këtij mediumi serb gjithashtu përmendet edhe mbledhja e kaluar e dy qeverive e mbajtur në Prizren gjatë janarit të viti 2014.

Të njëjtën pikëpamje takimit të dy qeverive – kosovare dhe shqiptare – ia jep edhe mediumi tjetër nga shteti fqinj, “Tanjug”, të cilët parafrazojnë kryeministrin shqiptar Edi Rama: “Shqipëria dhe Kosova kanë një ëndërr të përbashkët”.

Kjo nuk është hera e parë që me komentet e tij për Kosovën kryeministri shqiptar bëhet subjekt i përfolur në Serbi. /Insajderi.com