Kryetari i Partisë Demokratike të Kosovës, Memli Krasniqi, do të takohet pasditen e së martës me presidenten e Kosovës, Vjosa Osmanin, pas ftesës nga kjo e fundit lidhur me situatën e sigurisë në veri.

Një gjë të tillë e ka njoftuar shefi i komunikimit të PDK-së, Valmir Klaiqi.

“Takimi mes Kryetarit Krasniqi dhe Presidentes Osmani do të ndodhë sot, pasdite. Për detajet nga takimi do të ju njoftojmë pastaj”, tha Klaiqi për Insajderin.

Në takim me Osmanin sot ishte edhe kryetari i i LDK’së, Lumir Abdixiku dhe ai i AAK-së, Ramush Haradinaj.

Abdixhiku pas takimit tha se ka shprehur domosdoshmërinë e unitetit nacional në përballje me sfidat që mund të vijnë nga Serbia, si shtet sponsorizues e strehues i terroristëve.

“Kam shprehur mirënjohjen e Lidhjes Demokratike të Kosovës për të gjithë në shërbim. Kam shprehur po ashtu domosdoshmërinë e unitetit nacional në përballje me sfidat që mund të vijnë nga Serbia; si shtet sponsorizues e strehues i terroristëve”, tha ai.

Haradinaj pas takimit në një konferencë për media tha se biseduan për situatën e sigurisë në vend pas sulmit terroristë që ndodhi të dielën në veri.

“Me ftesë të presidentes shkova në këtë takim lidhur me situatën e Kosovës. Biseda ishte kryesisht me situatën e sigurisë nga zhvillimet në vend të ditëve të fundit të ndërlidhura me sulmin terroristë në veri ku humbi jetën, Afrim Bunjaku”, ka thënë Haradinaj.

Të dy liderët kanë njoftuar se pjesë e takimit ka qenë edhe shefi i AKI-së, Petrit Ajeti. /Insajderi.org/