Ish-presidenti i Kroacisë, Stipe Mesiç, ka thënë se askush nuk pret që në rajonin e Ballkanit të ketë konflikte të reja të armatosura duke thënë se një gjë e tillë është pothuajse e pamundur. Sipas tij, vizatimi i kufijeve ka përfunduar dhe në këtë drejtim nuk do të ketë ndryshime.

Mesiç ka folur edhe për marëdhëniet mes Kosovës e Serbisë. Ai ka thënë se është e rëndësishme që dialogu mes dy vendeve të vazhdojë.

Duke folur rreth mundësisë së njohjes së Kosovës nga Serbia, ish-presidenti kroat ka thënë se momentalisht është vështirë të pritet që në Serbi të mbizotërojë një linjë e cila do të ishte realiste dhe të pranojë realitetin e ekzistencës së Kosovës.

“Në këtë mënyrë do të uleshin tensionet dhe një ditë do të vijë edhe njohja”, ka thënë Mesiç në një intervistë për gazetën Zëri.