Një tjetër skandal ka plasur në komunën e Prishtinës, vëllait të kryesuesit të Kuvendit i janë ndarë mijëra euro, shkruan Insajderi.

Vëllait të kryesuesit të Kuvendit, Pëllumb Bajqinovci, Fatosit i janë ndarë 6 mijë e 800 euro nga 18 mijë sa kishte kërkuar nga komuna që po udhëhiqet nga Përparim Rama.

Organizata joqeveritare “Sport4all” e cila udhëhiqet nga ai është përzgjedhur në mesin e mbi 200 organizatave për t’u subvencionuar.

Ndërkohë, emri i Pëllumb Bajqinovcit figuron si themelues i “Sport4all” bashkë me Fjoret Pruthin dhe Fatos Bajqinovcin.

Kjo organizatë merret me organizimin e aktiviteteve sportive.

Nga Komuna e Prishtinës e kanë arsyetuar vendimin duke thënë se “Pëllumb Bajqinovci nuk ka përfituar subvencion nga kryeqyteti, meqë ai ka qenë bashkëthemelues por nuk është pronar apo bashkëpronar”.    

“Themeluesin e një organizate, institucioni apo kompanie nuk mund ta fshish nga biografia. Organizata në fakt ekziston që nga 2010-ta dhe vazhdimisht ka organizuar aktivitete të ndryshme sportive, e cila nga të gjitha qeveritë ka marrë subvencione për organizimin e këtyre aktiviteteve. Pëllumb Bajcinovci, nuk ka asgjë të bëjë me subvencionin. Përkrahja financiare kësaj organizate jo qeveritare i është dhënë pas vlerësimit nga komisioni i pavarur, i përbërë nga 5 anëtarë”, kanë thënë nga Komuna e Prishtinës për Kanal 10.

Komuna e Prishtinës ka ndarë rreth 620 mijë euro për 247 organizata joqeveritare./Insajderi.org