Prej muajsh publiku ka parë vetëm incizime të ish-kampionit të botës në kategorinë e rëndë të boksit profesionist, Mike Tyson, duke ushtruar për të luftuar me Jake Paul. Por gjatë një stërvitjeje të hapur, të martën mbrëma, Tysoni dha një paraqitje të shkurtër të asaj që mund të ndodhë kur të luftojë me Paulin. 58-vjeçari Tyson del në ring të premten në shtëpinë e Dallas Cowboys.

Të gjithë 14 boksierët që do të paraqiten në atë mbrëmje kishin stërvitje të hapura. Por, asnjëri prej tyre nuk mori brohoritje të fuqishme sa Tysoni.

Ai shpërbleu qindra shikues në “Toyota Music Factory” duke treguar shenja të forcës së tij të dikurshme.

“Godite atë Mike”, ishte një prej thirrjeve më të shpeshta. Tifozët e bënë të qartë se donin që boksieri legjendar ta godiste aq fort Paulin saqë godiste dorezat që mbante njëri prej trajnerëve të tij, të martën, në stërvitjen e hapur për publikun.

Ndonëse shfaqja impresionoi qartë tifozët, ajo zgjati vetëm rreth tre minuta.

“Kam kuptuar se jam më i fortë se që kam menduar që jam. Kur u pajtova për këtë luftë dhe fillova të ushtroja thashë: “Ku i kisha mendtë?’, tha Tyson në ring pas stërvitjes. “Përfundova procesin dhe tani lufta po bëhet. E gjithë puna e vështirë është bërë”.

Në stërvitje të hapur i fundit u paraqit Paul.

“Ndihem shumë mirë”, tha Paul gjatë intervistës së tij në ring. “Në formë, i fortë, shpërthyes. Do të jetë natë e shkurtër për Miken”, ka vazhduar Jake Paul.

Paul është 27-vjeçar dhe njihet si yll i “YouTubes”.

“Nuk ka të bëjë me atë se sa gjatë bëni diçka, por sa mirë e bëni atë. Të premten njerëzit do të më shohin duke dominuar ndaj personit që e ka bërë këtë gjithë jetën. Të premten ëndrrat e mia bëhen realitet dhe karriera ime fillon. Do ta nokautoj Mike Tysonin”, ka shtuar Paul.

Ylli i “YouTubes” ka bilanc prej dhjetë fitoresh e një humbjeje në boks. Shtatë prej fitoreve i ka me nokaut. Ka shënuar fitore ndaj një numri të luftëtarëve të MMA dhe boksierëve më pak të njohur.

Mike Tyson është njëri prej boksierëve më të njohur në histori. Ka 50 fitore, prej tyre 44 me ndërprerje. I ka edhe gjashtë humbje, pesë me ndërprerje. Legjenda Tyson nuk ka boksuar që nga viti 2005.

Të hyrat financiare nga ky meç do të jenë shumë të mëdha. Dhjetëra miliona dollarë do të përfitojnë dy boksierët. Ndërkohë edhe interesimi pritet të jetë shumë i madh.