Ministri i jashtëm i Republikës Çeke, Jakub Kulhanek, deklaroi se kërkim falja e dërguar nga presidenti i këtij vendi, Milos Zeman, në Serbi, në lidhje me bombardimin e Republikës Federale të Jugosllavisë gjatë luftës në Kosovë, ishte deklaratë personale e tij, raporton “Kosovo-online”.

Kulhanek vlerësoi se politika e Ballkanit Perëndimor është shumë komplekse.

“Një dialog afatgjatë është i nevojshëm për të zgjidhur jo një, por dhjetëra, në mos qindra padrejtësi”, tha Kulhanek në një përgjigje me shkrim.

Ai shtoi se është e rëndësishme për Republikën Çeke të ketë marrëdhënie të mira me Serbinë, siç janë sot.

Dje, në një konferencë të përbashkët shtypi të mbajtur me presidentin e Serbisë, Aleksandar Vuçiq, Zeman deklaroi se fushata ajrore e NATO-s kundër ushtrisë serbe dhe bombardimi i RF Jugosllavisë ishte një “gabim”.

Republika Çeke njohu Kosovën në maj të vitit 2008, tre muaj pas shpalljes së pavarësisë dhe hapi ambasadën e saj në Prishtinë në korrik të po atij viti./Insajderi.org.