Ministri i Mbrojtjes, Ejup Maqedonci, ka njoftuar sot se çështja e furnizimit me ushqim për ushtarët e Forcës së Sigurisë së Kosovës (FSK) është në fazën përfundimtare, shkruan Insajderi.

Në konferencën për media, Maqedonci sqaroi se aktualisht është duke u realizuar procesi i rekrutimit të stafit rekrutues, i cili do të merret me përgatitjen e ushqimit për ushtarët.

“Çështja e ushqimit është adresuar që më 30 shtator dhe tani jemi në fazën e rekrutimit të stafit për përgatitjen e ushqimit për ushtarët e FSK-së. Furnizimi me ushqim është realizuar në kohë reale dhe besojmë se, përveç kostos së ulët, ky proces do të sigurojë qëndrueshmëri dhe mbulueshmëri të plotë për nevojat e ushqimit të trupave”, deklaroi ministri.

Ai theksoi se ky hapi i fundit synon përmirësimin e kushteve për ushtarët e FSK-së, duke siguruar një sistem të qëndrueshëm dhe efikas për furnizimin me ushqim.