Ministrja e Drejtësisë, Albulena Haxhiu, ditën e djeshme ka nënshkruar një marrëveshje me Qeverinë e Shqipërisë.

Marrëveshja ka të bëjë me ‘njohjen e së drejtës së ushtrimit të profesioneve të avokatit dhe ndërmjetësit në zgjidhjen e mosmarrëveshjeve’.

Kundër kësaj marrëveshje ka reaguar ashpër Oda e Avokatëve të Kosovës. Në një email dërguar avokatëve thuhet se kjo marrëveshje është nënshkruar nga ministria pa marrë mendimin e Odës së Avokatëve të Kosovës dhe si e tillë nuk do të zbatohet pasi bie në kundërshtim me ligjin dhe se nuk është nën kompetencën e Ministrisë së Drejtësisë, shkruan Insajderi.

Tutje në këtë email thuhet se Ministria e Drejtësisë nuk ka përfshirë asnjë anëtar të OAK në grupin punues për përgatitjen e deklaratave të reciprocitetit për fushën e avokatisë, ndërmjetësimit dhe njohjen e provimit të Jurisprudencës së Republikës së Shqipërisë.

Po ashtu, në takimin e mbajtur me 5 qershor 2023 mes avokatëve nga Kosova dhe Shqipëria nuk kishte qenë i pranishëm as kryetari i OAK’së, Behar Ejupi dhe as ai nga Shqipëria, Maksim Haxhiaj.

OAK ka shtuar se nuk do të lejoj të cenohet pavarësia administrative e Odës./Insajderi.org