Në futbollin rus ekziston me të vërtetë një fenomen.
Në një kampionat që ndoshta nuk është në ditët e tij më të mira, por që dikur kanë luajtur një Jashin, një Bllohin apo një Arshavin, sot po shkëlqen një djalë nga Kosova.
I ardhur nga fushat e këqija të vendlindjes së tij, nga vështirësitë familjare në fëmijëri dhe i shpëtuar nga kurthi i vagabondazhit në adoleshencë, Mirlind Daku duket sikur të jetë një talent nga ata që prodhon Argjentina apo Brazili.
Sulmuesi i kombëtares shqiptare ishte në variantin e tij më të mirë kur Rubini priti në shtëpi Spartakun e Moskës, në duelin e javës së 20-të të Premier Ligës ruse.
Shënoi dy gola në suksesin e vështirë 2-1, fitore që ndihmon ekipin nga Tatarstani që të mbajë vendin e tetë në renditje.
Interesant fakti që 27-vjeçari i mori të dy asistet nga Ruslan Bezrukov, një lojtar rus mbiemri i të cilit do të thotë “njeriu pa duar”, por që këmbët këtë herë i pati të arta.
Gjithsesi, Daku pati edhe momentin e gabuar në stadiumin e Kazanit, kur mori të verdhën e dytë dhe kartonin e kuq në minutën e 75-të, në të njëjtën kohë që u përjashtua edhe lojtari I Spartakut, Aleksis Duarte.
Fatkeqësisht, që nuk do të luajë në ndeshjen e radhës, shkruan abcnews.
Gjithsesi, siç njoftojnë mediat ruse, ai u shpall lojtari më i mirë i ndeshjes, pavarësisht nga i kuqi.
Tashmë, sulmuesi kuqezi ka 11 gola e 6 asistë, pra 17 kontribute për gola në vetëm 19 ndeshje, diçka me të vërtetë e veçantë.
Vetëm Manfred Ugalde me 16, pikërisht lojtar i Spartakut, është përmbi shqiptarin, që ka arritur yllin e ri të Lokomotivës, Aleksej Batrakov.
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2025 Gazeta Online Insajderi - Të gjitha të drejtat e rezervuara.
