Për Joe Biden dhe Donald Trump dy kandidatët më të vjetër që kanë kërkuar ndonjëherë presidencën e SHBA-së mosha është një çështje elektorale që nuk munden ti ikin.

Të enjten, presidenti aktual demokrat, 81 vjeç, dhe paraardhësi i tij republikan, 78 vjeç, do të përballen në Atlanta, Gjeorgji, për të parën nga dy debatet para votimit të nëntorit.

Është momenti tu tregojnë amerikanëve një krahasim të gjendjes fizike dhe forcës mendore mes tyre.

Për 90 minuta, nën vezullimin e kamerave me definicion të lartë, Presidenti Biden dhe ish-Presidenti Trump të cilët mbeten pothuajse të barabartë në sondazhet e opinionit kombëtar do të luftojnë për çështje që variojnë nga ekonomia dhe luftërat deri te emigracioni dhe e ardhmja e demokracisë.

“Nuk mund të fshihet fakti që Biden është 81 vjeç, nuk mund të fshihet as fakti që Trump është në të njëjtën moshë,” tha Jim Messina, menaxheri i fushatës presidenciale të Barack Obamës në 2012.

Mesina shtoi se nuk është një garë moshe, por është një garë politike dhe çështje karakteri. Një pjesë e asaj që duhet të ndodhë të enjten mbrëma është vetëm fillimi i dallimeve mes tyre, tha ai.

Sondazhet tregojnë se votuesit janë shumë më të shqetësuar për moshën e zotit Biden sesa për moshën e kundërshtarit të tij. Por nëse Trump fiton, ai do të thyente rekordin e Biden si presidenti më i vjetër para përfundimit të mandatit të tij.

Një sondazh i marsit të New York Times tregoi se 73% e votuesve të regjistruar besonin se Biden ishte thjesht shumë i vjetër për të qenë një president efektiv.

Vetëm 42% e votuesve të regjistruar thanë të njëjtën gjë për Trump, pavarësisht nga një diferencë moshe prej vetëm tre vjet e gjysmë.

Zoti Biden u deklarua i aftë për detyrën që mban në fillim të këtij viti nga një mjek i Shtëpisë së Bardhë, por shqetësimet për moshën e tij kanë vazhduar që kur ai mori detyrën. Shenjat e plakjes së tij janë bërë më të dukshme vitet e fundit, duke përfshirë një zë më të butë të të folurit, gabime të herëpashershme të kujtesës dhe një “ecje të ngurtësuar” që mjeku i tij pjesërisht ia atribuon artritit./abcnews.al