Kryeministri i Kosovës, Isa Mustafa thotë se para propozimeve për poste në qeverinë e tij – Enver Hoxhajt ministër i Jashtëm dhe Hajredin Kuçit si zëvendëskryeministër – nga ana e PDK nuk ka pasur më parë propozime të tjera.

Derisa, javë më parë është folur se Partia Demokratike e Kosovës i ka propozuar Qeverisë edhe Gani Kocin për ministër të Drejtësisë. Çështje kjo e konfirmuar nga vetë Gani Koci.

Megjithatë, numri një i Qeverisë tha se javën e kaluar kanë emëruar ata emra të cilët i kanë marrë si propozime nga partneri i koalicionit, derisa propozime tjera, tha se nuk ka pasur.

“Ne kemi emëruar ministrat të cilët i kemi marrë si propozime nga partneri jonë më i madh i koalicionit. Nuk kemi pas propozime tjera”, tha kryeministri i Kosovës.

Kreu i ekzukutivit të vendit ka thënë se çështja e demarkacionit nuk e rrezikon liberalizimin e vizave për kosovarët.

Sipas tij, ka ende kohë për ratifikimin e kësaj marrëveshjeje.

“Mendoj se nuk po rrezikohet me këtë, është çështje e kryesisë së Kuvendit, kryesia do të vendosë në kohën që ata e vlerësojnë se duhet të vendosin lidhur me futjen në rend dite të marrëveshjes për demarkacionin e kufirit me Malin e Zi”, tha ai.

Këto përgjigje Mustafa ua dha gazetarëve pasi vizitoi Bifurkacionin e Lumit Nerodime në Ferizaj. /Insajderi.com