Kryeministri i Kosovës, Isa Mustafa, ka bërë të ditur mbrëmë vonë se në ambasadën e Kosovës në Bruksel ka takuar shefin ekzekutiv të kompanisë VanHool, Filip Van Hool, me të cilin tha se kanë biseduar për mundësitë e investimeve direkte të kësaj kompanie belge në Kosovë.

Megjithatë, Mustafa ka thënë se mungesa e Ligjit për Investime Strategjike, është disavantazh për Kosovën karshi vendeve të rajonit.

“Është kjo kompani e njohur në tregun botëror për prodhimin e autobusëve dhe kontejnerëve, me eksport në ShBA, Japoni dhe vendet e tjera. Kushtet që tani ofron vendi ynë për investime të jashtme direkte janë më të mira sesa më parë dhe konkurrente me vendet në regjion, por mungesa e Ligjit për Investime Strategjike, ligj të cilin e kanë vendet e tjera fqinje, është një disavantazh për të qenë konkurrent me kohën, karshi vendeve fqinje”, ka shkruar kryeministri Mustafa në facebook.

Tërheqja e investimeve të huaja direkte dhe hapja e vendeve të reja të punës, sipas Mustafës, mbetet prioritet absolut i Qeverisë së Republikës së Kosovës.