Kryeministri i Kosovës, Isa Mustafa, ka përkujtuar presidentin e ndjerë Ibrahim Rugova me rastin e 72 vjetorit të lindjes.

Mustafa ka thënë se populli i Kosovës shpreh respektin për veprën e presidentit të parë të Kosovës.

“Republika e Kosovës dhe populli i saj shprehin respektin për jetën dhe veprën epokale të Presidentit Rugova, i cili me vizionin, vendosmërinë dhe lidershipin e tij, e udhëhoqi Kosovën drejt realizimit të synimeve shekullore për liri, pavarësi dhe demokraci”, ka thënë Mustafa.

“Si themelues i shtetit të Kosovës dhe arkitekt i pavarësisë, Ibrahim Rugova u bë simbol i rezistencës së qytetarëve të Kosovës, duke pasur përkrahjen e të gjithë popullit të Kosovës, elitës intelektuale, patriotëve dhe të botës demokratike perëndimore”, ka thënë ai, njofton Kryeministria përmes një komunikate për media./Insajderi.com