Rasti i vdekjes së ish-aktivistit të Vetëvendosjes, Astrit Dehari është rikthyer përsëri në fokus. Mostrat e zhdukura nga Instituti i Mjekësisë Ligjore dhe akuzat e deputetit të VV-së, Haki Abazi ndaj bashkëpartiakëve, bënë që ky rast të jetë në qendër të vëmendjes. Nazlie Bala është një nga emrat që Abazi përmendi se janë në dijeni kush i ka zhdukur këto mostra. Bala e cila gëzon pozitën e këshilltares së ministres së Drejtësisë, Albulena Haxhiu po dyshohet se është përfshirë në një skandal.

Ministrja Albulena Haxhiu para tetë muajve ishe paralajmëruar nga Sindikata e Institutit të Mjekësisë Ligjore për ndërhyrjen e këshilltarës së saj politike, Nazlie Bala. Në letrën e siguruar nga Nacionale, mes tjerash nga kjo sindikatë thuhej se Bala po e dirigjon komplet punën në IML.

Para se të bëhej publike ankesa e sindikatës së IML-së, Bala u akuzua nga deputeti i Vetëvendosjes, Haki Abazi se është e “përfshirë” në rastin e zhdukjes së mostrave Dehari, shkruan Insajderi.

Kush është Nazlie Bala?

Nazlie Bala është pjesë e Lëvizjes Vetëvendosje qysh në fillet e para. Për një mandat, ajo ka qenë anëtare e VV-së në Komisionin Qendror të Zgjedhjeve. Po ashtu, ishte drejtuese e Sekretariatit të Gruas Aktiviste në këtë parti.

Me ardhjen e Vetëvendosjes në pushtet, Bala është emëruar këshilltare politike e ministres së Drejtësisë, Albulena Haxhiu.

Në shtator të vitit 2019, emri i Nazlie Balës u përmend në një skandal të drogës. Insajderi raporti ekskluzivisht se nipat e saj (djemtë e vëllait), u arrestuan nga Policia e Kosovës për prodhimin dhe shitjen e lëndëve narkotike. Njësitet e antidrogës kishin zbuluar dy laboratorë të sofistikuar për përpunimin e lëndëve narkotike. Bala nuk u deklarua asnjëherë publikisht për këtë çështje.

Një vit më vonë, u raportua se Bala në kundërshtim me ligjin kishte dhënë mijëra euro donacione për Vetëvendosjen. Siç tregojnë raportet financiare të publikuara nga Lëvizja Vetëvendosje, në periudhën 2017-2019 Bala ka dhënë saktësisht 5 mijë 980. Duke dhënë para për Vetëvendosjen në vlerë prej 3 mijë euro brenda një viti kalendarik, ajo ka shkelur Ligjin për Financimin e Subjekteve Politike, Nenin 5.1 dhe Rregulloren e KQZ-së për Financimin e Subjekteve Politike, Nenin 9.1

Si u përfshi emri i Nazlie Balës në zhdukjen e mostrave të Rastit Dehari?

Pasi u bë publik lajmi për zhdukjen e mostrave të ish-aktivisit të VV-së, Astrit Dehari, Bala dha disa detaje.

Ajo deklaroi se më 7 dhjetor gjatë ndërrimit të frigoriferëve ku ruhen mostrat e rastit Dehari, është kuptuar se ato nuk janë më aty.

Bala theksoi se proces i ndërrimit nuk kishte ndodhur që nga muaji tetor i vitit 2021 andaj nuk dihet kur ka ndodhur zhdukja e mostrave.

Por ndryshe deklaroi bashkëpartiaku i saj, Haki Abazi.

Përpos se akuzoi partinë e tij se nuk është demokrate dhe tenton të shuaj zërat kritik, Abazi përmendi zhdukjen e mostrave të rastit Dehari.

Ai tha se ekzistojnë video-incizime që dëshmojnë se kush i ka marrë mostrat e Deharit. Abazi ftoi prokurorinë që për këtë çështje ta intervistojnë edhe Nazlie Balën. Kjo e fundit në një kundërpërgjigje ndaj deklaratave të Abazit tha shkurtimisht se “kajtja e lakmija të korit”. /Gazeta Insajderi