Gjatë fushtës zgjedhore kryeministri i vendit Albin Kuri i kishte premtuar 4000 banesa për çiftet e reja të cilët do të mund të blihen me këste të ulëta, shkruan Insajderi.
Ndërkaq, ministri i Mjedisit Planifikimit Hapësinor dhe Infrastrukturës, Liburn Aliu, gjatë ditës së sotme ka thënë se premtimi për banim të përballueshëm po realizohet.
“Bashkë me drejtorin rajonal të IFC-së për Evropën Qendrore dhe Juglindore, z. Ary Naïm, nënshkruam marrëveshjen e bashkëpunimit për studimin e fizibilitetit për projektin e banimit të përballueshëm”, ka shkruar Aliu në Facebook.
“Studimi i fizibilitetit është hapi i parë i punës për rritjen e mundësive për banim të përballueshëm për ndërtimin e 4,000 njësive banimi moderne me çmime të përballueshme, të ndërtuara në mënyrë të qëndrueshme, duke kontribuar kështu në përmirësimin e jetës së qytetarëve tanë”.
Sipas tij, “qëllimi ynë është që të adresojmë një nga nevojat më urgjente të qytetarëve tanë, që është banimi i përballueshëm”.
Ai ka theksuar se pasja e banesave cilësore me çmime të përballueshme jo vetëm që do të përmirësojë cilësinë e jetës së tyre, “por gjithashtu do të ndihmojë në nxitjen e zhvillimit ekonomik dhe rritjes së qëndrueshme në Republikën e Kosovës”.
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2025 Gazeta Online Insajderi - Të gjitha të drejtat e rezervuara.
