Ministri i Administrimit të Pushtetit Lokal, Elbert Krasniqi, ka njoftuar nënshkrimin e një marrëveshjeje për ndërtimin e mbi 200 shtëpive në katër komunat veriore të Kosovës.

Ky projekt është realizuar në bashkëpunim me kreun e shoqatës “Jetimat e Ballkanit”, Halil Kastratin.

Në një postim në Facebook, Krasniqi tha: “Ministria e Administrimit të Pushtetit Lokal dhe shoqata ‘Jetimat e Ballkanit’, në kuadër të bashkëpunimit për sigurimin e një banimi të qëndrueshëm, do të ndihmojnë në ndërtimin e mbi 200 shtëpive për banorët e komunave veriore. Ky projekt do t’u ofrojë familjeve mundësinë për të realizuar ëndrrën e tyre për të jetuar në tokat e tyre.”

Sipas Krasniqit, “Më shumë se 100 shtëpi do të financohen nga Ministria e Administrimit të Pushtetit Lokal dhe mbi 100 nga shoqata ‘Jetimat e Ballkanit’, duke markuar një fillim të ri për këto familje.”