Izraeli ka “eliminuar” pasardhësin e liderit të Hezbollahut, Hassan Nasrallah, tha të martën kryeministri izraelit Benjamin Netanyahu.

“Ne kemi eliminuar mijëra terroristë, duke përfshirë vetë Nasrallah, pasardhësin e Nasrallah dhe pasardhësin e pasardhësit të Nasrallah”, tha Netanyahu në një deklaratë video.

Të shtunën, një burim sigurie libanez i tha CNN-it se Hezbollahu kishte humbur kontaktet me Hashem Safieddine pasi një sulm izraelit në periferitë jugore të Bejrutit e kishte në shënjestër atë të premten. Safieddine besohej të ishte një pasardhës i mundshëm i liderit të Hezbollahut, përcjell Insajderi.

Netanyahu iu drejtua drejtpërdrejt popullit të Libanit në deklaratën të martën, duke u kërkuar atyre që të ngrihen kundër Hezbollahut dhe të “marrin përsëri vendin e tyre”.

“Të krishterët, druzët, myslimanët – sunitë dhe shiitë – të gjithë ju po vuani për shkak të luftës së kotë të Hezbollahut në Izrael”, tha Netanyahu.

“Ju keni mundësinë për të shpëtuar Libanin përpara se të bjerë në humnerën e një lufte të gjatë që do të sjellë shkatërrim dhe vuajtje të ngjashme me atë që shohim në Gaza”, vazhdoi ai. /Insajderi.org/