Një helikopter i misionit paqëruajtës në Kosovë, KFOR, ka kryer një evakuim emergjent mjekësor të një djali të porsalindur nga Qendra Klinike Universitare në Prishtinë drejt një spitali në Beograd, derisa pak orë më parë e kishte marrë atë nga spitali i Graçanicës.

Siç njofton faqja zyrtare e KFOR-it në internet, fëmija kishte lindur në Graçanicë me një infeksion të rëndë në zemër që shpejt u përhap në mushkëritë e tij.

KFOR-i së pari e ndihmoi foshnjën duke e sjellë atë nga Graçanica në Qendrën Klinike Universitare të Kosovës në Prishtinë, ku mjekët arritën ta stabilizojnë gjendjen mjekësore të tij.

Pas një kërkese nga familja serbe e fëmijës për të vazhduar trajtimin në një spital të Beogradit, një helikopter ushtarak amerikan i misionit të KFOR-it në Kosovë, kreu evakuimin mjekësor të foshnjes drejt Beogradit, raporton Insajderi.

“Operacioni u bë i mundur nga bashkëpunimi i shpejtë midis autoriteteve serbe dhe KFOR-it”, shkruan faqja zyrtare e KFOR-it – Nato.int, përcjell Insajderi.