Me kombëtaren gjermane ka fituar një medalje bronzi në Botërorin e Afrikës së Jugut në 2010-n dhe një në Europianin e dy viteve më pas. Me Verder Bremenin ka ngritur tre trofe, por tani Tim Vize ka korrur një tjetër sukses. Kësaj here në ring.

Ish-portieri gjerman e nisi karrierën si mundës dhe mbrëmë në Mynih debutoi në WWE, federata më e rëndësishme e wrestling-ut. Para shtatë mijë të pranishmëve, “Makina” – kjo është nofka e 35-vjeçarit – doli menjëherë triumfues.

Vizes i mjaftuan vetëm 33 sekonda në një përballje 3 kundër 3, në të cilën “Makina” luftoi përkrah Cesaro-s dhe Sheamus-it kundër treshes Primo, Epico dhe Dallas, duke e mbyllur ndeshjen me një lëvizje vendimtare.

“Në futboll u ngrita deri në kombëtare, dhe tani në mundje jam ambicioz e dua të arrij objektiva të rëndësishme”, komentoi ish-portieri pas ndeshjes.

Tim Vize vari dorezat në gozhdë dhjetorin e shkuar, duke zgjidhur kontratën që kishte me Hofenhaimin. Pas një përvoje të shkurtër në bodybuilding, ai vendosi t’i futej rrugës së mundjes dhe u përgatit me seanca të gjata stërvitore që e çuan deri në Florida.

Ish-futbollisti u rrit në ekipet zinxhir të Bajer Leverkusenit dhe gjatë karrierës së tij mbrojti portat e Fortunës së Këlnit, Kaiserslauternit dhe Verder Bremenit. Me këtë të fundit fitoi një Kupë të Gjermanisë, një Superkupë dhe një Kupë të Ligës. Me ekipin përfaqësues, Vize numëron gjashtë ndeshje.