Prokuroria Speciale e Republikës së Kosovës ka ngritur një aktakuzë ndaj Sh.L., një individ i nacionalitetit goran, nën dyshimin se ka kryer krime lufte kundër popullsisë civile.

Aktakuza është ngritur në Gjykatën Themelore në Prishtinë, në Departamentin Special.

Sh.L. dyshohet se, në cilësinë e policit në Stacionin Policor në Prizren, gjatë periudhës së luftës në Kosovë, ka kryer vrasje, torturë dhe trajtim çnjerëzor ndaj popullsisë civile shqiptare në komunat Suharekë dhe Rahovec.

Hetimet kanë treguar se forcat policore serbe fillimisht i kanë arrestuar viktimat në këto rajone dhe më pas i kanë transferuar në Stacionin Policor në Prizren.

Si rezultat i këtyre veprimeve, një person i identifikuar si R. J. ka vdekur, ndërsa dhjetë (10) të tjerë kanë pësuar lëndime të rënda trupore dhe pasoja psikike.

Aktakuza tani i është dorëzuar Departamentit Special të Gjykatës Themelore në Prishtinë për procedura të mëtejshme. Sh.L. është në paraburgim, sipas vendimit të Gjyqtarit të procedurës paraprake, deri në një vendim të ri nga gjykata.