Policia ka arrestuar 3 punonjësit e Bashkisë Shkodër, të cilët u kapën ditën e djeshme duke transportuar qese me ushqime me furgonin e Drejtorisë Arsimore, për t’i shpërndarë për përfitime elektorale.

Nga të dhënat paraprake bëhet me dije se personat e arrestuar janë E. I., 31 vjeç, me detyrë Drejtori i Drejtorisë Ekonomike-Arsimore; P. D., 49 vjeç me detyrë Tekniku i Shërbimeve Mbështetëse në Drejtorinë Ekonomike-Arsimore; si dhe M. V., 63 vjeç, me detyrë Specialist i Financës në Drejtorinë Ekonomike-Arsimore, në bashkinë Shkodër.

Po ashtu, është shpallur në kërkim porositësi i pakove ushqimore, shtetasi A. B., 33 vjeç, me detyrë Drejtor i Drejtorisë së Ujësjellës-Kanalizimeve, bashkia Shkodër.

Shërbimet e policore, bazuar në inteligjencën informative, kanë bërë të mundur ditën e djeshme shoqërimin e 3 punonjësve të bashkisë Shkodër, pasi u kapën në unazën perëndimore të qytetit duke  transportuar një furgon, me 50 pako me ushqime.

Në përfundim të veprimeve procedural, 3 punonjësit u arrestuan për veprën penale “Korrupsioni aktiv në zgjedhje”, kryer në bashkëpunim. Sakaq, drejtori i Ujësjellës-Kanalizimeve është shpallur në kërkim.

Materialet procedurale i kaluan  Prokurorisë Pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.