Pas mesnate, respektivisht rreth orës 01:30 një sërë shpërthimesh të fuqishme zgjuan qytetarët e Çaçakut të Serbisë. Shpërthimet kanë ardhur nga një depo me granata në Pridvorica. Raportohet se ende ka shpërthime në disa zona, ndërkaq zjarrfikësit dhe policia ushtarake janë ende në vendin e ngjarjes.

Punëtorët e fundit të fabrikës Slloboda, të cilët ishin në ndërrimin e tretë u evakuuan me sukses, kështu që nuk pati viktima në këtë aksident, raporton b92.

Kreu i Shërbimit të Situatave Emergjente të qytetit të Çaçakut, Bratislav Zeçeviqit deklaroi se “Nuk pati viktima ose lëndime në serinë e shpërthimeve që ndodhën në kompaninë Slloboda. Nuk ka asnjë arsye që qytetarët të shqetësohen. 30 punëtorë të kompanisë dhe popullsia përreth u evakuuan”.

Në lokalizimin e zjarrit kanë marrë pjesë 45 zjarrfikës.

Momentalisht çdo gjysmë ore po dëgjohen shpërthime, dhe kur ato qetësohen zjarrfikësit mund të hyjnë në rrethin e fabrikës, deri atëherë ekziston mundësia e zgjerimit të zjarrit./Insajderi.org.