Klinika Onkologjike duket se nuk po funksionon si duhet prej disa ditësh. B.Sh (emër i njohur për redaksinë) është duke pritur për rrezatimin e nënës që nga ora 07:00 në mëngjes.

Qytetarja, terminin e nënës e kishte në orën 10:00 por radha deri në këto çaste nuk i erdhi. Ajo tha se si arsyetim doktorët e infermierët po e gjejnë aparaturën me defekte, diçka për të cilën ajo pohon se kishte njerëz për të cilët aparatura funksiononte.

“Kanë rrejte spo punon aparati njerëzit tu prit për rrezatime ka dy tre muaj, tjerët këtu që jom me kta afër i kanë majte rrezatimet. Domethënë aparati ka punu”, tha ajo për Insajderin.

Ajo tha se ka edhe persona të moshës 80 vjeçare që po presin që nga mëngjesi, madje edhe të tillë që udhëtojnë me mbi 200 km.

Gazeta Insajderi ka kontaktuar me Drejtorin e repartit të Onkologjisë, Ardian Millakun i cili tha se nuk është i njoftuar për rastin, por, problemi sipas tij mund të jetë tek ndonjë defekt në aparaturë ose përshpejtimi i procedurave tek disa pacientë.

Millaku tha se kjo nuk lidhet aspak me ndonjë neglizhencë të mundshme tek pacientët nga stafi.

“Sinqerisht, me sa e di ato janë tu kry ne procedure te rregullt vetëm ata që janë urgjent nuk presin fare, procedura shkon sipas protokollit qe e kanë. vetëm nëse ka pas defekt aparatura kanë mujt një ore me prit por jo me shumë, nuk ka diçka ndonjë neglizhence ose diçka. Disa presin afatin kohore disa marrin terapinë paradite mandej rrezatimin pasdite prandaj. Por kërkesa do të shqyrtohet merren masa”, tha Millaku për Insajderin.