Dy njerëz të afërt me Ardita Sinanin, ish-kryetaren e Komunës së Preshevës dhe këshilltares së kryeministrit Albin Kurti, kanë përfituar direkt nga fondi i Qeverisë së Kosovës për Luginën.

Gani Veseli, anëtar i Partisë për Veprim Demokratik (PVD) dhe Donika Behluli, bashkëshortja e Fatos Hysenit, ish-anëtarit të Kabinetit të Ardita Sinanit, kanë përfituar rreth 100 mijë euro bashkërisht nga projekte të mbështetura financiarisht nga Qeveria e Kosovës.

Qeveria e Kosovës i ka ndarë javën e kaluar, në një mbledhje të kabinetit qeveritar më 23 dhjetor, 1.2 milionë euro për Luginën e Preshevës. Mjetet i janë ndarë Këshillit Nacional Shqiptar dhe përfaqësuesve të Preshevës, Medvegjës dhe Bujanovcit.

Fondi është vënë në dispozicion për mbështetjen financiare të studentëve, OJQ-ve dhe artistëve nga Lugina e Preshevës.

Përzgjedhja e projekteve për përfitimin e mbështetjes financiare nga fondi, është bërë nga një komision i përbërë nga tre anëtarë. Dy anëtarë janë caktuar me aprovimin e Këshillit Nacional Shqiptar në Luginë dhe një anëtar është deleguar nga Qeveria e Kosovës.

Konkursi për financimin e projekteve të Organizatave jo-qeveritare dhe shoqatave kulturore e sportive është hapur më 1 tetor, por planifikimi i njerëzve të Ardita Sinanit për përfitimin e projekteve të financuara nga Qeveria e Kosovës ishte kryer para kësaj date.

Ish-drejtori i Kulturës në kabinetin e Ardita Sinanit, ish-kryetares së Preshevës, rezulton se e kishte hapur një organizatë jo-qeveritare një ditë para hapjes së thirrjes për aplikim.

Disa javë më vonë, fondacioni i udhëhequr nga Gani Veseli është përzgjedhur fitues i një projekti në vlerë prej 50 mijë eurove për “kultivime të tregimeve”, raporton Paparaci.

Një projekt në vlerë prej mijëra eurove e ka përfituar edhe Qendra për Inovacion Lugina 2022, një Organizatë jo-qeveritare e lidhur me njerëzit partiakë të Partisë për Veprim Demokratik të Ardita Sinanit.

Sipas dëshmive që ka siguruar Paparaci, Qendra për Inovacion Lugina 2022 drejtohet nga Donika Behluli, bashkëshortja e Fatos Hysenit, ish-anëtarit të kabinetit të ish-kryetares së Preshevës.

Përmes një projekti inovativ, fondacioni i bashkëshortes së bashkëpunëtorit të Ardita Sinanit ka përfituar saktësisht 41 mijë euro.

Qendra për Invoacion Lugina 2022, sipas të dhënave të prezantuara në agjencitë qeveritare në Serbi, figuron të jetë themeluar si OJQ më 14 tetor, në kohën kur ende ndodhej e hapur thirrja për aplikim në projektet e financuara nga Qeveria e Kosovës.

Të dhënat të cilat i ka siguruar Paparaci dëshmojnë se pesë mijë euro nga fondi i qeverisë do të shkojnë në mbështetje të një projekti për xhirimin e një dasme në “Rrafshnaltën e Peshterit”. Këtë projekt e ka përfituar një Organizatë jo-qeveritare nga Gjilani, në bashkëpunim me një shoqatë nga Novi Pazari.

Ardita Sinani është emëruar këshilltare politike për Preshevë, Medvegjë dhe Bujanoc në Zyrën e Kryeministrit Albin Kurti, në muajin shkurt të këtij viti.

Emërimi i Sinanit si këshilltare e kryeministrit Kurti, siç kishte njoftuar qeveria, përbënte hapin e parë drejt themelimit të Zyrës për Preshevë, Medvegjë dhe Bujanoc, në kuadër të Zyrës së Kryeministrit.

Qeveria e Kosovës ka ndarë ndihma financiare disa herë për shqiptarët që jetojnë në Luginën e Preshevës në territorin e Serbisë.

Sinani, nënkryetarja e Partisë për Veprim Demokratik, është e para grua politikane në Luginën e Preshevës dhe ka qenë po ashtu edhe kryetare e Preshevës.