Një diplomat i lartë amerikan në Pekin është tërhequr nga detyra për shkak se nuk bie dakord me vendimet e presidentit Donald Trump për ndryshimet e klimës.

Lajmi është konfirmuar nga Departamenti i Shtetit në Uashington, që ka deklaruar se bëhet fjalë për numrin dy të misionit diplomatik në kryeqytetin kinez, David Rank.

Mediat amerikane raportojnë se dorëheqja e Rank erdhi pas njoftimit të javës së kaluar të presidentit Trump, për tërheqjen e Amerikës nga marrëveshja e Parisit për klimën.

Një vendim ky, që sipas Trump do të mbrojë ekonominë amerikane, por që nuk u mirëprit nga liderët në mbarë botën.

Në një mbledhje me stafin e ambasadës, Rank tha se nuk mund ta mbështesë një vendim të tillë dhe se do të njoftojë autoritetet amerikane dhe kineze për tërheqjen e tij nga detyra.

“New York Times” citon disa miq të zotit Rank të thonë se, ai ishte shumë irrituar nga politikat e Shteteve të Bashkuara kundrejt Kinës, sidomos sa i takon ndryshimeve klimaterike.

“Zoti Rank mori një vendim personal. Ne vlerësojmë angazhimin disavjeçar të tij në shërbimin diplomatik”, ka deklaruar ndërkohë Departamenti i Shtetit.

Rank, që mori detyrën në janar 2016, de fakto ishte diplomati më i lartë amerikan në Kinë dhe shërbente si ambasador në detyrë. Terry Branstad, i zgjedhuri nga presidenti Trump për postin në fjalë, do të marrë zyrtarisht detyrën më vonë gjatë qershorit.