Presidenti amerikan, Barack Obama, thotë se dëshiron të arrijë marrëveshje me negociata për zgjidhje paqësore në Ukrainë, para se të largohet nga zyra në muajin janar.

Më tutje, gjatë një konference për gazetarë mbrëmë në Peru, ku ka marrë pjesë në samitin për Bashkëpunimin Ekonomik Azi – Paqësor (APEC), Obama e ka kritikuar rolin e Iranit dhe Rusisë në luftën civile brutale në Siri.

Presidenti amerikan tha se ka biseduar me presidentin e Rusisë, Vlaidmir Putin, për Ukrainën dhe për “nevojën që ne t’i kryejmë gjërat”.

“Kam kërkuar nga ai që t’i udhëzoj negociatorët e tij që të punojnë me ne, me Francën, Gjermaninë dhe Ukrainën, për të parë nëse ne mund ta bëjmë këtë deri në përfundim të mandatit tim”, tha Barack Obama.

Moska i ka mbështetur separatistët pro-rusë, që luftojnë kundër forcave qeveritare në pjesën lindore të Ukrianës.