Deputetët e Partisë Demokratike nuk do të kthehen në Parlament për të votuar reformën në drejtësi derisa të arrihet një marrëveshje e re.

Ky vendim është marrë gjatë mbledhjes së Grupit Parlamentar, të drejtuar nga kryetari Lulzim Basha, i cili ka informuar deputetët mbi propozimin e ri të bërë nga ambasadorët Lu dhe Vlahutin.

Edhe pse është shfaqur në hyrjen e selisë së PD-së për të përcjellë deputetët, të fundit prej të cilëve ish-kryeministrin Berisha, Basha nuk ka dhënë për mediat detaje mbi propozimin e ri të diplomatëve.

Ky bllokim i marrëveshjes, e cila pritej të miratohej si reformë e re e drejtësisë gjatë ditës së sotme, ka acaruar edhe eurodeputetin dhe raportuesin për Shqipëri në Bashkimin Evropian, Knut Fleckenstein.

Para pak minutash, eurodeputeti Fleckenstein ka shkruar në rrjetin social Twitter:”Tani e kam propozimin e fundit në tavolinë (për Partinë Demokratike). Këshilla ime: Fundi i bisedimeve, votoni në parlament”.

#Albania :Now last proposal on the table. My advice: End of discussions, vote!

— Knut Fleckenstein (@knufleckenstein) July 21, 2016

Sipas këtij paralajmërimi, reforma në drejtësi pritet të votohet sot në parlamentin e Shqipërisë./Insajderi.com