Regjisorja kosovare, Marigona Bekteshi-Ferati ka disa ditë që publikisht ka shprehur pakënaqësitë Këshillit Drejtues të teatrit “Muharrem Qena”. Ajo akuzon anëtarët e KD-së për shkelje ligjore dhe thotë se në këtë institucion vazhdimisht ka pasur tendenca për kapje.

Drama e nisur nga regjisorja, Bekteshi-Ferati dhe dramaturgia Albana Muja një muaj me parë, nuk ishte lexuar nga njëra anëtare e Këshillit, çka mundësoi që drama të shtyhet për një muaj.

Bekteshi-Ferati potencoi se ky këshill dhe çdo vendim i marrë tregon tendencën për orkestrim.

Gazeta Insajderi ka pranuar një informacion se njëra anëtare e Këshillit tashmë ka dhënë dorëheqje.

Nga burime të sigurta Insajderi mëson se anëtarja që ka dhënë dorëheqje është Teuta Selmani.

Insajderi ka kontaktuar me Selmanin dhe e njëjta konfirmoi se ka dorëzuar dorëheqjen dy ditë më parë.

“Po, kam dhënë dorëheqje. Vetëm për arsye personale, jo diçka tjetër”, tha ajo për Insajderin.