Drejtori i Divizionit për Rezervat Shtetërore të Mallrave, Hafiz Gara, dhe drejtori i Departamentit për Integrim Evropian dhe Koordinim të Politikave, Irfan Lipovica, janë arrestuar gjatë aksionit të sotshëm në Ministrinë e Industrisë, Ndërmarrësisë dhe Tregtisë.

Për Lipovicën madje aludohej se është dhëndër i Bedri Hamzës, kryetarit të komunës së Mitrovicës.

Hamza ka demantuar deklaratën e Qëndrim Krasniqit dhe i njëjti ka thënë se është shpifje e ulët.

I pari i komunës së Mitrovicës ka shtuar se nëse Krasniqi nuk e tërheq deklaratën e bërë dhe nuk kërkon falje, do ta padisë.

“Për sqarim për opinionin, unë i kam dy vajza dhe nuk janë të martuara dhe kam vetëm një vëlla i cili e ka vetëm një vajzë që as nuk është e martuar e as nuk punon, është studente në vitin e tretë në fakultet” ka thënë mes të tjerash Hamza.

Postimi i plotë:

Një person me emrin Qëndrim Krasniqi, publikisht ka deklaruar se “Irfan Lipovica, i arrestuar ditën e sotme, është dhëndër i Bedri Hamzës dhe se i njëjti është martuar me vajzën e vëllaut tim”. Kjo është një e pavërtetë e madhe dhe një shpifje shumë e ulët.

Prandaj, nëse ky person nuk e tërheq deklaratën e pavërtetë të tij dhe për të njëjtën nuk kërkon falje në mënyrën e njëjtë siç ka shpifur, do ta padis, njejtë siç kam bërë edhe në raste të tjera ndaj personave të tillë.

Për sqarim për opinionin, unë i kam dy vajza dhe nuk janë të martuara dhe kam vetëm një vëlla i cili e ka vetëm një vajzë që as nuk është e martuar e as nuk punon, është studente në vitin e tretë në fakultet.

Gjuhës së tillë shpifëse, fyese, mashtruese e propoganduese duhet t’i vije fundi.

Qëndrim, shihemi në gjykatë!