“Më duhet të jem i qartë, ne do ta kemi Asociacionin, ne do të jemi pjesë e procesit, dhe ai proces duhet të përfshijë Qeverinë e Kosovës”, ka deklaruar i dërguari i ShBA-së Gabriel Escobar, duke kërkuar që me urgjencë të nisin diskutimet për normalizim.

Për krijimin e Asociacionit Escobar përveç se në Prishtinë foli edhe në Beograd të mërkurën, e kjo e ka aktivizuar një zyrtar të Lëvizjes Vetëvendosje që të aktivizohet në Facebook.

Boiken Abazi, anëtar i Kryesisë së LVV-së, ka kërkuar që partitë opozitare në Kosovë të  nënshkruajnë një deklaratë sipas tij, kundër “Zajednicës”.

Por nëse ata nuk e “miratojnë” këtë kërkesë të Abazit sipas tij, “janë thjesht hiena”.

“Nëse partitë opozitare në Kosovë ia duan të mirën vendit, le të mblidhen e të bëjnë një deklaratë që e nënshkruajnë të gjithë bashkë kundër “Zajednicës” – ky po që do ishte unitet shtet-ndërtues. Për ndryshe, janë thjesht hijena që mezi presin të marrin pushtetin për ta shqyer shtetin”, tha Abazi. /Gazeta Insajderi