Prishtina u mposht mbrëmë nga Bashkimi në ndeshjen e gjashtë të Superligës së Kosovës në basketboll.

Por pavarësisht humbjes më shumë dhemb fakti i lëndimit të basketbollistit kryesor, Rashad Williams.

Basketbollisti pati një lëndim të rëndë dhe gjendja e tij u përkeqësua në palestër, pasi ra në tokë pa ndjenja.

Ai menjëherë u dërgua në spital me urgjencë, teksa gjatë ditës së sotme klubi kryeqytetas ka dal me njoftim për gjendjen e tij.

Në njoftimin e lëshuar në rrjetin social Facebook, shkruhet se ai ka pësuar një goditje të rëndë në regjionin e qafës dhe pas ekzaminimeve mjekësore i është vendosur imobilizatori në qafë dhe është liruar nga spitali.

“Për seriozitetin e lëndimit dhe kohën e rekuperimit do t’ju njoftojmë posa të kemi informacione të reja”, shkruhet ndër të tjera në njoftimin e Sigal Prishtinës.

Kujtojmë se bardhekaltrit pas gjashtë ndeshjesh kanë katër fitore e dy humbje, teksa ndeshjen e radhës do ta luajnë ndaj Vëllaznimit.