Vendimi për shpalljen e konkursit për emërimin e Kryeprokurorit të Shtetit nga Këshilli Prokurorial i Kosovës e ka befasuar Ambasadën e Britanisë në Kosovë.
Përmes një reagimi ambasada britanike është shprehur se ka ofruar mbështetje për rekrutimin e Kryeprokurorit, por kjo nuk është marrë parasysh dhe është shpallur vendimi.
“Edhe përkundër faktit se një mundësi për të dëshmuar partneritet dhe transparencë u humb, presim që KPK të zhvillojë proces rekrutues të mirë, transparent dhe meritor”, thuhet tutje në reagim e ambasadës.
Për këtë Gazeta Insajderi ka kontaktuar Këshillin Prokurorial të Kosovës.
Të njëjtit janë shprehur se shumë shpejt do të dalin me një qëndrim, pasi momentalisht janë duke e analizuar reagimin e Ambasadës.
“Për pak do të dalim me një qëndrim, momentalisht jemi duke e analizuar reagimin e Ambasadës së Britanisë në Kosovës”, ka thënë zëdhënësi i KPK-së, Astrit Kolaj për Insajderin.
Këshilli Prokurorial i Kosovës (KPK) të mërkurën në takimin e parë të mbajtur për vitin 2022 mori vendim që të shpallë konkurs për emërimin e Kryeprokurorit të Shtetit. Konkursi për këtë pozitë u vendos të jetë i hapur 15 ditë pas shpalljes së tij, duke filluar nga 17 janari. Në takimin e djeshëm, KPK-ja po ashtu e themeloi edhe Panelin Vlerësues për poentimin e kandidatëve që aplikojnë për pozitën e Kryeprokurorit të Shtetit.
Kryeprokurori aktual është Aleksandër Lumezi, atij i përfundon mandati më 21 prill.
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2025 Gazeta Online Insajderi - Të gjitha të drejtat e rezervuara.
