Tentimi i djegies së veturës private të deputetit dhe shefit të Grupit Parlamentar të Partisë Demokratike të Kosovës në Kuvendin e Kosovës, z. Adem Grabovci është një veprim kriminal, që në vazhdën e sulmeve të ngjashme që po ndodhin ndaj zyrtarëve të shtetit të Kosovës, kanë për synim të krijojnë klimën e frikës dhe pasigurisë në shoqërinë kosovare.

Partia Demokratike e Kosovës konsideron se veprimet e tilla, qartësisht anarkiste dhe antidemokratike, janë duke cenuar vlerat themelore mbi të cilat bazohet shteti ynë, sikurse është sundimi i ligjit dhe vlerat morale mbi të cilat është e bazuar vetë shoqëria jonë të tilla si paprekshmëria e familjes dhe pronës private.

Duke cenuar këto vlera morale, ideatorët e këtyre veprimeve po synojnë të bartin konfliktin politik nga institucionet në jetën familjare dhe qytetare.

Partia Demokratike e Kosovës kërkon nga mekanizmat institucionalë të sigurisë që t’i zbardhin, sa më parë që është e mundur, autorët e këtyre veprimeve dhe t’i vënë ata para drejtësisë.

Partia Demokratike e Kosovës falënderon qytetarët e Republikës së Kosovës për dinjitetin dhe pjekurinë politike të treguar në vazhdimësi në raport me situatën aktuale politike në vend.