Agim Çeku nga Partia Demokratike e Kosovës nuk ka dhënë përgjigje të prerë nëse veprimi i presidentit për formimin e ushtrisë është bërë në koordinim me partnerët ndërkombëtar.

Ai beson se edhe aleatët e këtij procesi do të kenë mirëkuptim për këto veprime, duke marrë parasysh nivelin e sigurisë në rajon.

“PDK si partia më e madhe dhe si kontribuuesja më e madhe për shtetformim, i jep mbështetje të fuqishme nismën së presidentit për transformimin e FSK-së në ushtri”, ka thënë Çeku gjatë një konference për media.

“PDK e vlerëson lart nismën, duke shtuar se kjo është bërë në përputhje me zotimet e tij si president”, ka shtuar ai.

Çeku ka thënë se presidenti u është përgjigjur pritjeve të qytetarëve dhe të gjithë atyre që e kanë pritur, duke e vlerësuar drejt situatën e sigurisë në rajon.

“Nisma e presidentit është përgjigjja më e mirë për Listën Serbe, e cila vazhdimisht e ka bllokuar këtë proces, duke dërguar mesazh se Kosova për çështjet e veta nuk e pyet askënd”, ka deklaruar Çeku.

Me këtë veprim, sipas Çekut, po rrumbullakohet kontributi i UÇK-së, pastaj TMK-së dhe i FSK-së së vjetër për t’u ndërruar në një FSK të re.

Ai ka shtuar se ky veprim nuk është i drejtuar kundër askujt, por është për të gjithë dhe në mbrojtje të të gjithëve, duke i kontribuar paqes dhe stabilitetit në vend dhe rajon.

PDK sipas tij, do të angazhohet për një ligj për FSK-në që e bënë këtë ushtri me standarde të NATO-s, multietnike dhe në shërbim të të gjithë qytetarëve të saj./Insajderi.com